قصيدة تجيب الوناسة

ياللي تدور في المعاصي وناستك ,,,
عمر المعاصي ماتجيب الوناسة,,,

في طاعة المعبود تلقى سعادتك ,,,
وليا عصيته ذقت هم وتعاسة ,,,

في الدين تلقى كل مطلوب حاجتك ,,,
ماهوب في مال كثير ورياسة ,,,

أنا أشهد إن الدين فخرك وعزتك ,,,
كان الفخر والعز تبغى لباسه ,,,

ارفع للمعالي مطلب الجود همتك ,,,
صرح المعالي ثبت جسور ساسه ,,,

رم للمعـالي واصعـد بكـل قوتك ,,,
خل الطمان لعاشقين الدناسه ,,,

خل لولي العرش مقصود وجهتك ,,,
والمرجلة ماهيب تدرس دراسة ,,,

إن كان ماحصلتها وقت شبتك ,,,
تصعب على الرجال لا شاب راسه ,,,

اجعل لمرقى نايف الجود نظرتك ,,,
الذيب ماينظر لماطى مداسه ,,,

الناس تحكم شخصك بلفظ هرجتك ,,,
عس الكلام اللي تقوله عساسه ,,,

اعرف قدر ميزان تصنيف كلمتك ,,,
هي من ذهب وإلادخلها نحاسه ,,,

لاتنطق إلا هرج(ن) يزيد هيبتك ,,,
لاطب سوق(ن) فاق دره وماسه ,,,

واللي يعيبك دونه اقفل محطتك ,,,
لاتسقي العراف من مر كاسه ,,,

إن كان مافاحت على العز دلتك ,,,
وإلاترى دربك كثير عكاسه ,,,

لاتنعدم عند المناعير شيمتك ,,,
اسلك طريق الطيب واترك طفاسه ,,,

سحب المنايا وين ماكنت جايتك ,,,
لو حط من دونك متارس احراسه ,,,

يالله يامطلوب نرجيك رحمتك ,,,
لادق ناقور المنايا اجراسه ,,,

رجواي يامولاي عفوك وجنتك ,,,
اغفر خطا عبد(ن) تزايد اعماسه .....

وسلامتكم ,,,,,,,,,